Апликација за следење на распоред за предавања

Пишува Игор Стојанов
 
Апликација преку која студентите ќе можат да се информираат за распоредот на својот факултет победи на првиот студентски Хакатон на Универзитетот „Гоце Делчев“ во Штип. Овој маратон по компјутерско програмирање беше во организација на студентите од Факултетот за информатика, а на него учество зедоа околу 30-тина студенти од штипскиот факултет но и од факултетот ФИНКИ од Скопје.
Настанот викендот се одржа во просториите на факултетот во Штип, а студентите имаа можност да програмираат апликации за различни платформи на тема „Студентски живот“. После презентацијата на апликациите првото место им припадна на студентите Ненад Ефремов и Дарко Ефремов од Факултетот за информатика од Штип. Тие изработија апликација која ќе им го олесни студентскиот живот на студентите преку информирање за распоредот или потсетување каде и кога имаат предавање.
Жири комисијата, која беше составена од професори и асистенти на Факултетот за информатика оцени дека оваа апликација треба да го земе првото место. Откако ќе се финализира апликацијата ќе биде достапна за студентите.
Студентскиот Хакатон се организира за првпат во рамките на Универзитетот „Гоце Делчев“ , а годинава се организираше со поддршка на Студентскиот парламент, Факултетот за Информатика и Центарот за односи со јавноста при УГД. Студентите кои го организираа годинава се надеваат дека овој настан ќе прерасне во традиција во рамките на Факултетот за информатика на УГД.